Шаггүй шатарчин

Үүний түрүүн шаггүй бөх байсан тухайгаа бичсэн. Одоо шаггүй шатарчин байсан тухайгаа бичнэ ээ, яадгийм.

За, ер нь би бол шатар их хожуу сурсан. 10-р ангид байхдаа, дүүгээрээ заалгаж сурсан. Тэгээд анхны багштайгаа тоглоод хожигдчихоороо уурлаж, шатрын хөлгөө авч шиддэг, шартай шатарчин байлаа.

Их сургуульд ороод, яаж зүгээр байхав, ойр хавийнхантайгаа тоглож, оюутны байрандаа за бараг л бүгдийг нь хождог болж, овоо маадгар байдаг боллоо.

Тэр үед манай курсэд нэг шатрын спортын мастер бидэнтэй хамт сурч байлаа. Ер нь манай курсэд уран сайхны гимнастикийн, чөлөөт бөхийн, боксын, шатрын спортын мастер гэсэн ЗХУ-ын спортын мастер 4 хүн сурдаг байлаа. Мань шатрын спортын мастер 4-5 дугаар курсдээ бүр оюутны байранд бидэнтэй цуг амьдардаг болж, бид орж гардаг, нэлээн ойр дотно нөхөрлөдөг байлаа. 

Бусад нь хэр зэрэг эрэмбэлэгддэгийг мэдэхгүй, манай шатрын спортын мастер бол Бүгд найрамдах улсдаа 2 дугаарт эрэмбэлэгддэг, уг нь лут амьтан л даа. Тэгэхдээ л харахаар, энэ бид хоёрын шатар тоглодог гэж хаашаа харсан юм байдаг юм гэмээр, нээк том занхайсан буржгар хар толгойтой, намхан, амаа ангайлгаж, шүлсээ гоожуулдаг мангар хүүхэд шиг харагддаг нэгэн байдаг байлаа. 

Оюутны байранд бараг бүгдийг нь хожоод, сүүлдээ тоглох хүн ч олдохгүй шахам, бяр амтагдаж байх үед нөгөөхийг чинь за, хоёулаа нэг нүүчихье гэхээр, эй яршиг, яршиг, за дараа гээд ерөөсөө тоглож өгдөггүй байлаа. Олон ч удаа тэгж гуйсан даа. Сүүлдээ, юуны тулд би монгол хүн билээ, монгол хүний хардамтгай зан маань хөдөлж, өө, энэ одоо хожигдчихно гэж айгаад байгаа юм байна л доо. За, нээрээ, мастер мастер гэчихээд надад хожигдчихвол нэр сүрэнд нь муухай юм даа гэж өөрийгөө овоо дөвийлгөн боддог боллоо. 

Иймэрхүү маягтай бараг нэг жил болсны дараа нөгөөхийг чинь за нэг нүүчих үү гэсэн чинь за гэж байна. За, ёстой нусыг нь сугартал хожоод өгье гээд л яаран шатраа өрөөд л тоглолоо. Таван минут ч хүрэхгүй хугацаанд, 20 ч нүүлгүй, хожигдлоо. Дараа нь нөгөөх чинь шууд л миний нүүсэн нүүдлүүд дээр анализ хийгээд, чи эхлээд ингэж нүүсэн, энэ сайн нүүдэл байсан, дараа нь тэгж нүүсэн, тэр чинь муу нүүдэл байсан гээд бүх нүүдлийг минь, өөрийнхөө нүүдэлтэй хамт сэргээн санаж, ингэсэн бол дээр байсан, тэгсэн бол тэгэх байсан, хойшдоо тэр тэрийгээ анхаар гээд үнэтэй зөвлөгөө сургамжаа өгдөг байна ш дээ. Хэ хэ.

Ингэж би өөрийгөө ямар нусан жур шатарчин бэ гэдгээ яс махандаа ортлоо мэдэж авч билээ. Хэ хэ. Тэгэхдээ л улсдаа хоёрт эрэмбэлэгддэг шатарчныг нусыг нь сугартал хожно гээд тоглож байсан гэхээр бас л шаггүй шатарчин болж таараад байгаа юм даа. Гах гах.

Оюутан цагийн найз, шатрын спортын мастер маань одоо Бруней улсын шатрын шигшээ багийн дасгалжуулагч болсон байна лээ. Хүү нь бас шатарчин болсон гэсэн. Хүүгээ дасгалжуулаад л, олон улсын тэмцээнүүд дээр манай шигшээ багийн шилдгүүдтэй хүч үздэг л юм байна лээ. Харин би ганцаараа компьютертэйгээ шатар нүүж, нусыг нь сугартал хожиж, кайф аваад л байгаа юм даа гэж! Алив, нэг үзчих амьтан байна уу! Хэ хэ.

Би ч бас л том бөх шүү!

"Харь хол явж үзээгүй намайг, харин Ленинтэй уулзлаа гэхээр их гайхдаг юм" гэдэг шиг ах нь цагтаа улсын цолтой бөхчүүдтэй л хүч үздэг том бөх байлаа шүү дээ гэж. Хэ хэ.

Би биеэр жижиг ч шаггүй барилдчихдаг хүүхэд байлаа. Цэрэгт очоод, үндэсний бөхөөр барилдахад бол үнэндээ жижигдэнэ л дээ, тэгэхдээ өөр хоорондоо барилдах болохоор барилдана л даа. Тэгээд батальон дээр бөхийн тэмцээн зохиохоор ер нь тогтмол шөвгийн дөрөвт шалгараад байдаг байлаа. Түрүүлж бол үзээгүй ээ. Тэгээд аз таардаг юм уу, яадаг юм, шөвгийн дөрөвт яаж ийгээд л үлдчихээд байдаг байлаа. Ангидаа бол барилддаг хүний л тоонд ордог байлаа.

За, тэгсэн чинь армийн үндэсний бөхийн аварга шалгаруулах тэмцээн болох юм болоод урьдчилсан шатанд нь анги бүрээс дөрөв дөрвөн бөх оролцуулах юм болсон чинь хэ хэ, хөөрхий шинэ цэрэг шалгарчихдаг байна ш дээ. Уг нь миний үндэсний бөхөөр барилдах гэж юу байх вэ дээ, тэр үед 54-55 кг-аас ерөөсөө дээш гардаггүй хүн байлаа шүү дээ. Харин одоо бол 70-80 килотой, гүзээгээ унжуулчихаад, барилддаг гэвэл, хүн аан, тийм байх оо гэмээр амьтан байгаа юм чинь. Тэгэхдээ хэрэггүй гүзээ чинь хэрэггүй байдаг юм байна лээ. Хурд байхгүй, хүч гарахгүй, хөл гар нь хөдлөөд ч нэмэргүй, гүзээ нь хамжиж дэмжиж өгч чадахгүй хоцроод байдаг юм байна лээ. 

За, тэгээд очоод барилдах юм боллоо. Бусад ангиудаас ёстой сүрдмээр том том биетэй цэргүүд, аймаг цэргийн цолтой бөхчүүд иржээ. Хамт ирсэн хал цэргүүд маань айгаад барилдахаа болилоо. Үнэхээр бид бол ёстой жижигдэж, жолдож байгаа юм чинь. 

Бүх оролцогчдыг дотор нь бараг гурав дөрвөн ч подгрупп болгосон байх оо. Манай группт 32 бөх тойргоор барилдаж байгаа юм. Энд л миний бөх байх үеийн оргил үе тохиож, улсын начин Эрдэнэбаяр, Цэнгэлсүрэн, Сумъяа нартай таарч барилдаж байгаа юм чинь. Ха ха. Би ч өөрийгөө  хүн ганц гуд татахад уначихгүй овоо сүрхий бөх гэж боддог байлаа. Тэгтэл нөгөөдүүл чинь намайг бол зүгээр л шууд гуд татаад л сарвайтал нь дөрвөн хөллүүлчихэж байгаа юм чинь. Яг үнэндээ тэд надтай барилдах үедээ улсын цол аваагүй, аймаг, цэргийн цолтой бөхчүүд байсан л даа. Тэгээд л удалгүй дараа жил л бараг улсын цолоо авцгаасан байх. 

Би ч яахав, барилдсан бүх бөхдөө унаж, амьдралдаа анх удаа баян ходоод болж үзэв. Харин баян ходоодны шагнал гэж өгөхгүй байна лээ. Хэ хэ.

Гэхдээ л гурвын гурван улсын цолтой бөхтэй уран мэхийг уралдуулан барилдаж байсан гэхээр том л бөх байгаа биз дээ. Хэ хэ.

Househusband

Монгол хэлэнд чинь гэрийн эзэгтэй гэж ажилгүй, гэртээ гэр орныхоо ажлыг хийгээд суудаг авгайг хэлдэг биз дээ. Энэ ажилдаа тэд их дургүй ээ. Юм л бол эрийн боол, гэрийн зарц болохгүй нтр гээд их ширүүн ш дээ. Англиар тэдний housewife гэдэг гэж байна. Тэгэхээр мөн гэрээ сахиад суудаг эр хүн байвал househusband л гэх байлгүй.

Миний бодоход, ажилгүй, гэртээ, гэрээ сахиад, househusband хийгээд суухад бас зүгээр ээ. Би л лав дуртай хийдэг. Одоо бараг сүүлийн 5 жил гэрээ сахиж байна шүү дээ. За, яг юу хийдгээ одоо цухас дурдая даа.

За, өглөө унтаж байтал, бүх улсууд босоод, чимээгүйхэн ажил албандаа гараад явцгаана аа. Ах унтаж байна аа. Тэгж байтал нэг нойр ханана аа. Тэгээд босоод, нүүр гараа угаагаад, цайгаа ууна аа. Цай чанаад тавьчихсан байна. Цайлж дуусаад, ажлын өрөөндөө орж компьютерийн ард сууна аа. За, тэгээд е-мэйлээ шалгана, дараа нь өглөөний сонин гарчиглана, тэгээд коммент бичих гэх хүндтэй ажлаа эрхэлнэ дээ. Тэгээд ойролцоогоор 2-3 цаг зугаацаад сууж байтал нүд аргаад, бие нозоороод залхуу хүрнэ. Тэгэхээр нь болиод, компьютерээ унтраачихаад, өрөөндөө ороод орон дээрээ гараад зурагтаа асаагаад үзнэ ээ. Суваг суваг солиод, баруун тийшээ нэг харж хэвтээд л, зүүн тийшээ нэг сэлгэж хэвтээд л, янз янзаар үзэж байтал, эсвэл өдрийн цайгаа уусны дараа гэнэт нойр хүрээд, дахиад сайхан хурхираад унтана аа. Удаан унтахгүй л дээ, жаахан зүүрмэглээд сэрчихнэ. Тэгэхдээ сайхан амарсан байна. 

За, тэгээд уг нь жаахан салхинд явбал биеийн эрүүл мэндэд зүгээр юм даа, сүүлийн үед нэлээн таргалаад байна гээд цонхоороо гадагшаа тэнгэрийн байдал харж байгаад, гарч шуудангийн салбараас сонингоо авахаар явна. Салхитай, бороотой, хэт халуун гээд л байгаль цаг агаарын тааламжгүй нөхцөлтэй байвал явахгүй ээ. 

Гэрээс гарахдаа бараг хаашаа явж байгаа ч мэдэхгүй явна. Яахав, шуудангийн хайрцгаа нэг эргэе дээ гэх маягтай. Тэгээд тэр өдрийн байдалдаа зохицуулаад үдээс хойш жаахан гадуур явж байгаад ажлаасаа тарж ирж байгаа юм шиг 7-8 цагийн үед гэртээ ирнэ. Ирэхэд оройн хоол бэлэн болчихсон байна. Хоолоо идчихээд ер нь энэ улсад чинь юу болоод байгаа юм бол гээд, хэрэгт дурлаад Цагийн хүрд үзнэ ээ.

Цагийн хүрдээ үзчихээд, дахиад ширээндээ сууж, компьютерээ асаагаад, коммент бичих, блог бичих ажилдаа орно доо. Тэгээд л залхуу хүртлээ, дургүй хүртлээ, жаахан интернэтдэж байгаад л унтана даа. Өглөө нь босоод бас дахиад л өчигдрийн хийснээ эхнээс нь дараалуулаад л хийнэ. 

Ажилгүй, гэртээ суудаг, housekeeping husbandын ажил гэвэл нэг иймэрхүү. Тийм ч хэцүү ажил биш л байгаа биз дээ. Би л лав бүр дуртай болоод байна. Яршиг, энэ ажлаа би өөр ямар ч ажлаар солихгүй ээ.

Хийх юм байхгүй байхад хийе гээд зүтгээд байхын хэрэг байна уу.

Би ер нь жаахан унтамтгай л даа. Өглөөгүүр бол унтаж л байна шүү. За, тэгээд, хэдэн цаг болох нь хамаагүй, ер нь нойр ханахаар л босно. Заримдаа хар өглөөгүүр 7, 8 цагт сэрчихээд нойр хүрэхгүй болохоор босоод юу кийнээ, сээгийднэ ш дээ. За, ер нь голдуу 10, 11 цагт, хааяа заримдаа 12 цагт босно. Архи уусныхаа маргааш бол үдээс хойш 3, 4 цагаас хойш л босвол босох байх, босохгүй бол үргэлжлүүлээд унтана аа. 

За, дандаа би ийм байсан юм уу гэвэл бас чиг үгүй юм аа. Ер нь бол 35 насыг хүртлээ бол, бага ид, бага унт, их унш, их ажилла гэсэншүү маягтай байжээ, одоо бодоод байхад. 35 настайдаа эргээд нэг харсан чинь ажил амьдралдаа ямар ч амжилт гаргаагүй, хэний ч мэдэхгүй, юу ч хийгээгүй, байдаг л нэг баагий болсон байв. За, тэгээд л амьдралынхаа философийг өөрчилж, нэгэнт л энэ ертөнцийн суутан болж чадахгүйгээс хойш, төрдөг үхдэг хүний орчлонгийн эгэл жирийн үхдлийн амьдралаар амьдрая даа гээд жаал архи уув, авгай эргүүлэв, дураараа иддэг уудаг болов, дуртай үедээ унтдаг болов, дуртай цагтаа босдог болов. Ном зом уншихыг бүрмөсөн болив. Энэ балай юмнуудыг уншсанаас болоод юу ч мэдэхгүй байж, даргын өөдөөс цор цор хийлээ гэсэн хэл аманд орооцолдоод байна ш дээ. Уг нь би ямар ч даргатай албан тушаал, ажил бизнесийг нь булаацалдаагүй л дээ. Зүгээр л цээжнийхээ бангаар худлаа ярихаар нь үгүй ээ, ямар ч логикоор аваад үзсэн энэ бол боломжгүй зүйл гээд л худлаа ярьсныг нь санамсаргүй няцаачихсан л байгаа юм даа. Энэ үйлдлээ би өөрөө ч анзааралгүй хийчихсэн. Тэгээд боссыг ажилчдынх нь өмнө гутаан доромжилсон гэсэн хүнд ялаар мулт үсрэвэй. Бид хоёрыг яриад зогсож байхад хэн ч байгаагүй ш дээ гэсэн чинь нярав, нягтлан, цэвэрлэгч гээд зөндөө хүн чагнаад зогсож байсан гэнэ ээ. Тэгээд би даргыгаа ажилчдынх нь өмнө, (уг нь би ч ялгаагүй, хөлсний ажилчин шүү дээ!) гутаан доромжлон хэрэгтэн болов шүү дээ. Хэ хэ. Манай дарга бол Эдийн засгийн ухааны магистр. Би бол эдийн засгийн А ч байхгүй, эдийн засгийн ухаанаар ТМС ч төгсөөгүй. Бид хоёр уг нь маргаад яах вэ дээ, угаасаа миний мэдэхгүй сэдэв юм чинь. Тэгсэн чинь нэгэн сайхан өглөө би гэнэт "Манайхан дэлхий глобалчдагдаж байна, Монгол дэлхийн улс төр, эдийн засгийн бараг л амин чухал цэг болж байна гэх шиг сонин юм яагаад яриад байдаг юм бол оо. Дэлхий нэг амьсгаа, нэг алхаагаар алхдаг гэвэл би л лав итгэхгүй ээ. Наад захын доллар, нефтийн дэлхийн ханш унаад л байхад, манайд тасралтгүй өссөн хэвээрээ л байна" гээд хэлчихжээ. Тэгсэн чинь манай дарга "тэгэлгүй яахав, манайх чинь бараг Орос, Хятадын рубль, юань, доллар ямар ханштай байхыг тогтоодог аягүй чухал газар" гэсэншүү хачин шогийн юм ярихгүй юу. Тэгэхээр нь би, Орос, Хятад хоёр чинь энэ донсолгооноос шууд хамааралтай, өсөж буураад л явж байна, май хар аа гээд, компьютер дээрээсээ нэг график үзүүлчихэж гэнэ. "Харин манайд яагаад хамаагүй юм бэ" гээд ханшийн мэдээтэй сонин үзүүлчихэж гэнэ. Тэгснээ "Манайтай огт хамаагүй, манайх дэлхийн эдийн засгийн дүр зургийн хэсэг бараг биш. Эсвэл мэдээлэл манайд сар, жилээр хоцорч ирдэг. Тэгээд л тэнд 1 жилийн өмнө болоод өнгөрсөн юмыг энд бид өнөөдрийн сенсаци болгож ярьдаг" гэсэн гэжаагаа. Гэсэн гэжаагаа гэдэг нь би хожим нь намайг яллах баримт болсон зүйлээс эргэн санахыг хичээж байгаа болохоос, уг нь миний хувьд ердийн л нэгэн өглөө сонин уншиж байгаад л маргалдаад, маргаанаа би баримтаар нотлоод ялчихсан л явдал шүү дээ. Түүнээс биш, би даргыгаа доошоо хийгээд л, өөрийгөө дөвийлгөөд л, нээээээээээээээээк ордны хуйвалдаан хийж, түүний албан тушаалыг булааж авах гээд байсан юм огт байхгүй. Өөрөөр би яах юм бэ, би хувийн компаний удирдлагыг булааж авна гэж байхгүй биз дээ, шууд шорон шаана биз. Аа, тэгээд л би, төрд ч ажиллаж чадахгүй, хувьд ч ажиллаж чадахгүй, үхэж байсан муу хүүр юм аа гэж өөрөө өөрийгөө нэг их сайхан харааж билээ.

Одоо тэгээд хийх ажилгүй сайхан гиюүрч, гудамж метрлээд сайхан байна доо. Аз болоход, Интернэт гэж сайхан юм байна. Яг над шиг ажилгүй гаруудад зориулагдсан эд шиг байгаа юм ш дээ. Энэ блогийг ч гэсэн хийх ажилгүй, дэмий гиюүрч байснаас арай дээр гэж хөтөлдөг ухаантай. Гэрээсээ гарахгүй болохоор сонин хачин явдалтай бага учрах юм байна ш дээ. Тэгээд жаахан сонирхолгүй, хэт хувийн чанартай бичлэгүүд болоод байх шиг санагддаг юм.

Ажилгүй, тэгээд архичин хүмүүсийн яруу алдар бадартугай! Ура, нөхөд өө, ура!!! 

Паах, энэ багшийн гуяыг ээ!

Орос хэл сурах гэж будилуулж байсан, монгол оюутнуудын онигооноос сонссоноо үргэлжлүүлье дээ.

Биднийг очиход, Мэндээ тэгсэн, Мэндээ ингэсэн гээд л өнгөрсөн жил төгсөөд явчихсан оюутны тухай их ярьдаг байлаа. Хамт олны дотор бусдыгаа хөгжөөж, бас заримдаа онигоонд оромтгой тийм хүмүүс бас таардаг даа. Тэдний л нэг байсан бололтой байдаг. Мэндээг мэдэх үү, миний хамгийн сайн найз гэж хэлж байсан казах оюутныг мэдэх юм байна. Тэгэхээр нэртэй л оюутан байсан байгаа биз.

Мэндээгийн хамгийн хүчтэй онигоо нь: "Паах, энэ багшийн гуяыг ээ!" гэсэн гэж байгаа юм. Гадаад оюутнуудад орос хэлний хичээл тусад нь ордог байлаа. Голдуу орос багш нар, тэгэхдээ бас унаган орос хэлтэй бага ястан багш нар ч орно л доо. Тэгээд Мэндээ группдээ ганцаараа эрэгтэй, ангийнхан нь дандаа монгол охид, бүгд хуулийн чиглэлээр хамт сурдаг болохоор нэг группт хамтдаа орос хэлнийхээ хичээлд ордог байж. Орос хэлний багш нь алтан шаргал үстэй, мяраалагдуу, залуухан багш гэнэ. Нэг их халуун өдөр багш нь арай богинохон банзал өмсөөд ирсэн чинь, мань Мэндээ: "Паах, энэ багшийн гуяыг ээ!" гэж өөрийн эрхгүй дуу алдсан гэж байгаа. Түүнийг нь ангийнх нь охид түмэн олонд түгээчихгүй юу.

Мэндээгийн дараагийн хүчтэй онигоо нь: "У вас чёрный человек есть?" гэсэн асуулт гэж байгаа. Алдарт Мэндээ ангийнхаа охидуудтай буу алаад л, гөө, манай багш нөхөртэй болов уу гээд л асуугаад байна гэнэ. Тэгэхээр нь нөгөөдүүл нь бид яаж мэддэг юм бэ, чи тийм их сонирхоод байгаа юм бол өөрөөс нь асуухгүй юу л гэж. Тэгтэл хичээл орж байтал, мань Мэндээ самбаачлаад, багшаасаа асууж байна гэнэ: "У вас чёрный человек есть?" Багш нь яаж ойлгох вэ дээ, "Чёго оо???" гээд л үнэн гайхширч байна гэнэ. Ангийнх нь охид харин бүгд аймаар ойлгоод пирхийтэл инээлдэнэ биз. Багш нь бүр алмайрна биз. Тэгээд нөгөө охидууд чинь ёстой нулимсаа гартал инээлдэж, элгээ дарж байгаад л багшдаа тайлбарлаж өгч дээ. Багш аа, Мэндээ таниас багш аа, та нөхөртэй юу гэж асууж байна аа. Манай монгол хэлэнд нөхөр гэдгийг хар хүн гэж эерүүлэн хэлж болдог юм аа. Түүнийгээ махчлаад шууд орчуулчихаар ийм хачин таны ойлгохгүй үг болчихлоо гэж тайлбарлаж өгөөд, багштайгаа хамтдаа инээлджээ.

У ваас есть чёорный человеек?

Сагс л жаахан үзэх юм даа

Улс орны эдийн засаг доройтоод, хийе гэхээр ажил олдохгүй юм, хийгээд ч хэрэггүй юм шиг ээ. Цалин мөнгөө ч өгөхгүй, луу унжих юм аа. Гэртээ, яршиг зүгээр зурагт үзээд л хэвтэж байх нь дээр ч юм шиг. Гараад явахаар архи уучихаад болохгүй юм. Тэгэхээр гэрийн хорионд байсан нь л өлзийтэй юм шиг ээ.

За, би бол сумо үзвэл зөвхөн макүүчи зиндааныхны барилдааныг л үздэг. Түүнээс доош зиндааныхны барилдааныг үзвэл өөрийгөө доромжилж байна гэж үздэг хүмүүн бөлгөө. Анх эхлээд Евро лигийн багуудын тоглолтыг нэлээд үздэг байлаа. За, MBA-гийн үндэсний супер лигийг бол огт үздэггүй дээ. Хэдэн цэцэрлэгийн хүүхэд сагс тоглохыг харж байгаа юм шиг л ямар ч сонирхолгүй. WNBA-г ч үздэггүй. Хэрэв би WNBA-г үзээд сууж байвал, аль нэг багт аятайхан бие хаатай хүүхэн тоглож байна, тэр хүүхнийг л тэндээс харвал ямар байх нь вэ, эндээс нь харвал ямар байх нь вэ гээд шинжээд л сууж байгаа гэж ойлгоход болно. Түүнээс биш тоглолт, ур чадварыг нь огт сонирхдоггүй. За, ганц үздэг тоглолтууд гэвэл NBA л байна. Евро лигийн тоглолтоос ч хавьгүй илүү гоё тоглолтууд гаргадаг шүү. NCAA-г бас үзэх дуртай. Ёстой залуу насны азаартаар, бас л гал гарсан тоглолтууд болно шүү.

Төвийн тоглогчид, нэгэнт од болчихсон тоглогчдоос илүүтэйгээр шинээр гарч ирж байгаа тоглогчид, биеэр жижиг боловч, тоглолтын ур чадвараар үнэхээр гайхамшигтай, холбон тоглогчдыг голчлон шүтэн үздэг дээ. Тухайлбал, Хьюстон Рокетсийн Жеймс Харден, Голден Стейт Уоррайорзийн Стефен Карри, Чикаго Буллзийн Деррик Роуз нарыг нэрлэж болж байна. Энэ гурвын хэнийх нь ч бөмбөгтэй харьцаж, талбайгаа бүхэлд нь харж, хамтран тоглогчдоо мэдэрч байгаа байдал, тэгээд ур чадвар нь үнэхээр аугаа даа. 

Энэ жилийн хувьд Голден Стейтийг аварга болох болов уу гэж горьдож байгаа ш дээ. Зүүн бүсээс Атланта Хоукс, Чикаго Буллз хоёр шөвгийн дөрөвт үлдэх болов уу. Баруун бүсээс Хьюстон Рокетсийг бас дөрөвт үлдэх байх гэж бодож байгаа ш дээ. За, хэр зөв таасан нь тэгээд удахгүй тодорхой болно л доо.  

Ленин багшийн төрсөн өдөр

Өнөөдөр бидний баярын өдөр үнэнч багш Лениний минь төрсөн өдөр юм байна ш дээ. Хэ хэ.

Хорвоо дэлхий ч хувьсахдаа амархан юм даа. Би ч одоо Ленин багшийнхаа төрсөн 1970 онд 100 жилийн ойг нь нүсэр тэмдэглэсэн тэр үеэс л эхлээд санаад байх шиг байдаг юм. За, тэгээд арай ч цэцэрлэг мэцэрлэгтээ Ленин багш магш гэж долигоноогүй байх. Баатарчууд, пионер байхдаа "Хүн бүхний багш аа, хүндэт Ленин багш аа, хүндэт Ленин багш аа, бидний хайртай багш аа", "Манай багшийн багш аа, манлай Ленин багш аа", "Ленин багш минь хосгүй эрдмийн суут нар аа хөө өө" гээд л сургуулийнхаа найрал дууны хооронд зогсоод дуулдаг байлаа ш дээ.

Тэгэхдээ ч манай зарим нэг ардчилагч нар шиг "Ленин багшийн үйл хэрэгт үүрд мөнх үнэнч" энэ тэр гэж тангараг өргөж байсангүй. Харин манай анхны ардчилагч нар 1990 оны 4 сарын 22-нд хоороороо тангараг өргөж байсныг гэрчлэх тэр үеийн сонины шарласан хуудсууд олдох байх шүү.

Тэгтэл одоо юу болов. Нэг сүрхий хувьсгалч нөхөр, Лениний нүд нь яг алуурчны нүд шиг байсан гээд, хөшөөг нь авч хаяад сүйд болов. Би зургийг нь харахаар, аятайхан, сайхан, нүдэнд дулаахан хүний л нүд харагдах юм билээ. Хөшөө нь Улаан хуаранд нэг тохижилт үйлчилгээний компаний бололтой хашаанд шороонд дарагдаад хөсрий хэвтэж байхыг хараад нүднээс нулимс гарах гэж байна лээ ш дээ. Би ч Ленин багшид хайртай л золиг шиг байгаа юм.

За, за, сайхан тэмдэглэх баяртай боллоо. Та бүхний эрүүл мэндийн төлөө! Ленин багшийн төрсөн өдөр сайхан болж байна шүү!